يابوي وأمـي لاتخافـو وتبكـون=المـوت بـاب وكلنـا داخلينـه
الديـن نادانـي ولبيـت ممنـون = نادت بلادي والعهـد حافظينـه
حنا جنود الدين والدين مصيـون = نحمي وطنـا مـن أذى طامعينـه
والله مانرضى بـذل(ن) ولاهـون = لأجل الوطن كل العمـر باذلينـه
يبقى عزيز بديـن ربـي ومامـون = واحنا فدا الدار وفـدا ساكنينـه
فإن فارقت روحي جسدها فتكفون = العذر منكـم والعفـو طالبينـه
موتي فخر ماهو بحسرات مغبـون = شهيد بإذن الله دفـاع(ن) لدينـه
ياحظ منهم بالشهـاده يفـوزون = فـازو بجنـه والرضـا كاسبينـه
الذنب مغفور(ن) ولاهو بمفتـون = تاج الوقار اللـي لهـم لابسينـه
يوم الفزع آمن ولاهـو بمحـزون = والحور في الجنـه تـرى راغبينـه
سبعين من أهله عساهـم ينالـون = شفاعته مـن ضمنهـم والدينـه
إن جيتو أهلي لازم إنكم تهنـون = قولو شهيـد وراسكـم رافعينـه